Textum a T. Leccisotti Montis Casini 1965 editum
recognovit Enrique Alarcón et instruxit

---

---

[L22] Bernardus Aygler, Privilegium Universis Christi fidelibus presentes licteras inspecturis, Bernardus Dei gratia Casinensis humilis abbas et conventus Casinensis salutem in Domino sempiternam. Licet beatissimus pater noster Benedictus principaliter fuerit monastice legis lator et pater specularis omnium monachorum, in sue tamen fundamentis doctrine necnon et conversationis exemplis omnium religionum edificia sua iaciunt fundamenta, et specialiter ordo a beato institutus Dominico, qui et si ad predicandum populis sit principaliter institutus, monasticum tamen nec habitum deserit nec conversationis insignia derelinquit, qui et munere paupertatis prepollens, mundi amatores libera voce castigat et contra incredulorum versutias sacre pagine iaculis cuius est assiduus perscrutator, arcu predicationis corda sigictat eorum, ipsos ad fructum penitentie compungendo. hunc igitur ordinem universali Ecclesie necessarium, nobis non disparem nec a religionis nostre semitis deviantem, nobis libenter astringimus, nobis et unimus, non tantum vinculo caritatis sed et loci propinquitatis honore. hinc est quod nos prefato Predicatorum ordini ob honorem Dei et venerabilis viri fratris Thomasii de Aquino ac religiosi viri fratris Troiani de eodem Predicatorum ordine karissimorum amicorum nostrorum promerente dilectione, edificandi domum et ecclesiam in civitate nostra Sancti Germani conventui fratrum Predicatorum convenientem, in loco quem ibidem habere poterunt, salvo monasterio nostro censu annuo in quo esset onerata possessio quam dante Domino acquirent ibidem, liberam concedimus facultatem, et ad concessionis huiusmodi perpetuam firmitatem, presentes licteras sigillorum nostrorum munimine roboratas. Datum in monasterio nostro Casinensi anno Domini Mº CCº LXXº, XXVII die decembris, XIII indictione, Apostolica Sede vacante.