Textum a M. H. Laurent Sancti Maximini 1937 editum
recognovit Enrique Alarcón et instruxit

---

---

[L6] Gregorius IX, Ad Riccardum de Egido Gregorius episcopus servus servorum Dei dilecto filio magistro Riccardo de Egido, canonico Fundano, salutem et apostolicam benedictionem.
Dilecti filii abbas, conventus monasterii Casinensis nobis conquerendo monstrarunt quod nobilis vir Philippus, dominus Aquini, et quidam alii Aquinatensis et Sorane civitatum et diocesum super quodam molendino ecclesie Sancti Nazarii de Cammino, ad idem monasterium pertinentis, et rebus aliis iniuriantur eisdem. Ideoque discretioni tue per apostolica scripta mandamus, quatinus partibus convocatis, audias causam, et, appellatione remota, debito fine decidas, faciens quod decreveris per censuram ecclesiasticam firmiter observari, proviso ne in terram dicti nobilis excommunicationis vel interdicti sententiam proferas, nisi a nobis super hoc mandatum receperis speciale. Testes autem, qui fuerint nominati, si se gratia, odio vel timore subtraxerint, per censuram eandem, appellatione cessante, compellas veritati testimonium perhibere.
Datum Reate quarto idus iulii, pontificatus nostri anno decimo.