[L2] Canonici S. Petri de Canneto, Acta renuntiationis In nomine Domini amen. Anno incarnationis Christi millesimo CCº XVIIº, pontificatus domini Honorii pape III anno primo, mense februarii, die XI, indictione quinta. Nos quidem presbyter Taddeus prior et Nycolaus subdiaconus, canonici ecclesie sancti Petri de Canneto, nuntii et procuratores capituli eiusdem ecclesie apud Sedem apostolicam constituti, hac die presenti, propria et spontanea voluntate in presentia vestra, domine Pandulfe et domine Sinibalde, domini pape camerarii, nomine nostro et totius capituli memorati recognoscimus et firmiter protestamus electionem eiusdem ecclesie sancti Petri de Canneto et ius electionis ipsius immediate ad dominum papam Honorium et successores eius et ad Romanam ecclesiam pertinere. Ideoque pro nobis et dicte ecclesie capitulo universo, libera et spontanea voluntate, ad opus et nomen ipsius domini pape et Romane ecclesie renuntiamus illi electioni seu nominationi a nobis et a dicto capitulo facte de persona domini Iacobi clerici, filii domini Landulfi de Aquino, ad regimen ecclesie memorate; presertim cum dicta electio, si electio dici debet, in eiusdem domini pape et Romane ecclesie noscatur preiudicium attemptata. Quam electionem auctoritate propria a dicto capitulo factam in manus vestras nomine dicti pape et Romane ecclesie libere resignantes, renuntiamus etiam quicquid iuris et actionis utilis vel directe, tacite vel expresse, pro electione seu occasione vel respectu electionis predicte nobis et dicto capitulo competit vel inde posset competere quoquomodo; ita ut deinceps contra dictum dominum papam et successores ipsius ac Romanam ecclesiam nulla super hoc vel occasione huiusmodi materia remaneat questionis. Actum est hoc in camera dictorum camerariorum domini pape coram subscriptis testibus ab hoc specialiter rogatis, scilicet: domino Iohanne de Theobaldo, clerico sancti Clementis, teste; Alkerutio Iohannis Bobonis, teste; Roberto de Arpino, serviente camere, teste; Petro de Aquino, cursore domini pape, teste; Iohanne de Sancto Germano et aliis testibus. Et ego Riccardus imperialis aule scriniarius hanc cartam de predictorum canonicorum consensu scripsi et complevi rogatus.