Fragmenta a M. H. Laurent Sancti Maximini 1937 edita
recognovit Enrique Alarcón et instruxit

---

---

[L1N1] Ryccardus de S. Germano, Chronica, anno 1197 Tunc etiam Oddo, frater ipsius, ad expugnandum Roccam Siccam, in qua se Raynaldus et Landulfus de Aquino, fratres, contra imperatorem receperant, ab ipso imperatore dirigitur; et ipse se confert in Siciliam imperator, ubi ad se duci imperatricem iubet ...

[L1N2] Ryccardus de S. Germano, Chronica, anno 1210 Tunc idem Otto se Capuam confert, ubi receptis a Dyopuldo ceteris munitionibus quas habebat in regno, ducem Spoleti efficit illum. Hic cum gente ipsius Ottonis ivit ad debellandum civitatem Aquini, in qua Landulfus, Thomas, Pandulfus et Robbertus domini Aquini, qui regis fidem servabant, se receperant cum gente sua; et cum non prevaleret in eam, viribus resistentibus predictorum, confusus et non sine dampno recessit ...

[L1N3] Ryccardus de S. Germano, Chronica, anno 1220 Tunc apud Sanctum Germanum Landulfus de Aquino, filius domini Aymonis, per imperatorem iustitiarius factus est Terre Laboris ...

[L1N4] Ryccardus de S. Germano, Chronica, anno 1229 Venerat tunc temporis ad Sanctum Germanum Nycolaus de Cicala pro parte imperatoris, et Henricus de Morra magister iustitiarius superius nominatus cum regni filiis, Raone de Balbano comite, Landulfo de Aquino et Stephano de Anglone iustitiario; Adenulfo de Aquino, filio nobilis viri Thome de Aquino Acerrarum comitis, Roggerio de Galluccio, aliisque undique congregatis imperatoris fidelibus, ad resistendum hostibus prompta voluntate paratis; domini etiam de Aquino Pandulfus et Robbertus Aquinum pro fide Cesaris laudabiliter munierunt ...