Textus a B. M. Reichert et J. J. Berthier Lovanii 1896 editos
recognovit Enrique Alarcón et instruxit

---

---

[CB3] Gerardus de Fracheto, Cronica Ordinis, excerptum A tempore autem sancte memorie magistri Iordanis usque ad annum domini Mº CCº Lº VIIIº fuerunt de ordine fratrum predicatorum magistri licenciati a cancellario Parisiensi et actu et ordinarie legentes in sacra pagina Parisius fratribus et scolaribus: fratres Rotlandus Cremonensis, Hugo Viennensis, postmodum cardinalis; Iohannes de sancto Egidio, Anglicus; Guerricus Flandrensis, Gaufridus de Blevello, Burgundus; Albertus Teutonicus, Laurencius Brito, Stephanus Altissiodorensis, Guillelmus de Stampis, Johannes pungensasinum, Parisiensis; Bonus homo Britus, Helias Provincialis, Florencius Gallicus, Thomas de Aquino Apulus, Hugo Metensis, P. Tarantasiensis, Bartholomeus Turonensis, G. de Anthona, Anglicus; Baldoinus Gallicus; Enibaldus Romanus, postmodum titulo basilice ·XII· apostolorum presbiter cardinalis. Hii omnes in domo sancti Iacobi ordinis predicatorum Parisius duo et duo legerunt et disputaverunt in scolis, presentibus scolaribus et religiosis et multis ecclesiarum prelatis, Deo et hominibus graciosi et multum fructum in docendo et in scribendo in Dei ecclesia facientes.