CORPUS THOMISTICUM
BREVIS INTRODUCTIO

Consilium Corpus Thomisticum intendit praebere investigatoribus subsidia praecipua ad studium Sancti Thomae, publice ac gratis patentia apud Interretem. Quinque sunt partes eius:

• Editio plena operum omnium Sancti Thomae, secundum optimos textus quoad possumus.
• Catalogus bibliographicus omnium studiorum de S. Thoma eiusque doctrina quae in lucem prodierunt a saeculo XIII usque ad hodiernum tempus.
• Index potissimorum operum quae ut auxilia investigatoribus exstant, necnon et editio praestantiorum.
• Automaton quod verba, sententias, citationes, similitudines, correlationes, data etiam statistica inveniat, glomeret, ac ordinet.
• Editio phototypica praecipuorum exemplarium manuscriptorum operum Thomae de Aquino.

Sermone Latino utimur, quia si opera Thomae ut vere sunt legis, certe nosti linguam eius.

Corpus Thomisticum intenditur ut opus collectivum: collaborationes omnes permagno aestimamus. Si articulum in lucem prodidisti quod in Bibliographia deest, mitte notitiam. Si invenis notitiam aliquam esse erratam, rectam remitte. Si habes textum praestantiorem alicuius operis Thomae, vel novum subsidium vel vetus edidisti, allega eum: bonum enim est diffusivum sui.