Textum a M. H. Laurent Sancti Maximini 1937 editum
recognovit Enrique Alarcón et instruxit

---

---

[L5] Gregorius IX, Pro Haymone de Aquino Patriarche Antiochen. Apostolice sedis legato.
Ad ea per que carissimus in Christo filius noster Henricus illustris rex Cypri nobis et ecclesie gratis potest se reddere gratiosum, celsitudinem eius precibus et monitis eo facilius excitamus quo plenius de sua sinceritate confidimus eum illa libenter efficere, que nostro beneplacito grata valeant residere. Hinc est quod cum nobilem virum Haymonem de Aquino, nobis et ecclesie Romane fidelem, nobilis vir I. de Ybelino in quadam munitione Templi cepisse dicatur et in carcere detinere, serenitatem regiam rogamus, monemus et hortamur attente ut pro nostra et apostolice sedis reverentia predictum nobilem, quem nobis restitui pro munere postulamus, ad nostram procuret remitti presentiam redditum libertati, preces nostras taliter admissurus quod suis, cum oportunum fuerit, et nos etiam annuamus. Quo circa mandamus quatinus predictos regem et nobilem ad id moneas et inducas et si necesse fuerit eundem nobilem per censuram ecclesiasticam, appellatione remota, compellas, proviso ne in terram dicti nobilis, et cetera.
Dat. Anagnie id. ianuarii, anno sexto.