CORPUS THOMISTICUM
Iacobus de Aquino
Acta renuntiationis electionis ipsius
ut abbas S. Petri de Canneto
die XI mensis februarii MCCXVII A.D.

Thomas de Aquino a Velázquez depictus (Temptatio Sancti Thomae, Museo Diocesano, Orihuela [España])

Textum a M. H. Laurent Sancti Maximini 1937 editum
recognovit Enrique Alarcón et instruxit





Ad indicem fontium vitae S. Thomae





[L3] Iacobus de Aquino, Acta renuntiationis In nomine Domini amen. Anno incarnationis Christi millesimo CCº XVIIº, pontificatus domini Honorii pape III anno primo, mense februarii, die XI, indictione V. Ego quidem Iacobus clericus, filius domini Landulfi de Aquino, electus in abbatem sancti Petri de Canneto a capitulo eiusdem ecclesie, hac die presenti, propria et spontanea voluntate, in presentia vestra, domine Pandulfe, Norwicensis electe, et domine Sinibalde, camerarii domini pape, recognosco atque protestor electionem eiusdem ecclesie sancti Petri de Canneto et ius electionis ipsius immediate ad dominum papam Honorium et successores eius ac Romanam ecclesiam pertinere. Ideoque libera et propria voluntate renuntio libere ac resigno in manus vestras ad manus et nomen ipsius domini pape et Romane ecclesie nominationem seu electionem illam, si electio dici debet, que de persona mea facta est a capitulo ad ecclesiam memoratam, presertim cum in eiusdem domini pape et Romane ecclesie noscatur preiudicium atemptata, renuntians nichilominus et refutans quicquid iuris et actionis utilis vel directe, tacite vel expresse super electione predicta seu occasione vel respectu electionis ipsius mihi competit vel dehinc in antea posset competere quoquomodo; ita quod deinceps contra dictum dominum papam et successores eius ac Romanam ecclesiam nulla super hoc materia remaneat questionis. Actum est hoc in palatio Lateranensi in camera dictorum camerariorum domini pape coram subscriptis testibus ad hoc specialiter rogatis, scilicet: Alkerutio filio Iohannis Bobonis, teste; Iohanne de Sancto Germano, teste; Cencio Iohannis Bonelli, teste; Bonoseniore de Camera, teste; Roberto de Arpino, teste; Actone et aliis testibus. Et ego Riccardus imperialis aule scriniarius hanc cartam de consensu predicti Iacobi scripsi et complevi rogatus.



Ad indicem fontium vitae S. Thomae




© 2011 Fundación Tomás de Aquino quoad hanc editionem
Iura omnia asservantur