CORPUS THOMISTICUM
Fratris Bentii OP
Notitia de canonizatione Sancti Thomae de Aquino

Thomas de Aquino a Velázquez depictus (Temptatio Sancti Thomae, Museo Diocesano, Orihuela [España])

Textum a M. H. Laurent 1931 editum
recognovit Enrique Alarcón et instruxit





Ad indicem fontium vitae S. Thomae





[NBC] Frater Bentius, De canonizatione S. Thomae Reverendis in Christo fratribus magistro Aymerico, priori provinciali Lombardie inferioris, priori Bononiensi, magistro et patribus dicti conventus frater Bentius reverentiam et amorem.

Nova gaudia nuper nuntiata, que iam per alias litteras vobis scripsi, modo vobis scribo Dei graciam fore completam, scilicet de canonizatione gloriosi doctoris fratris Thome de Aquino.

Siquidem die precedenti festum beati Alexii tenuit dominus papa consistorium publicum, et primum sermonem fecit incipiens: Hec dies boni nuncii est, quia bona vobis annuntiare habemus de fratre Thoma de Aquino, ideo: Scitote quia mirificavit dominus sanctum suum; Dominus exaudivit me, quum clamavero ad eum.

Hoc thema divisit et sermonem fecit; dicens eum in sancto ordine Predicatorum apostolicam vitam duxisse; qui ordo, sive fratres, nihil habens proprium, licet aliquid habeant in communi sicut apostoli habuerunt, et apostolicam vitam ducunt, et eius miracula esse plene probata, specificans de inefabili odore procedente de corpore eius et sepultura, quum fuit aperta, et quod firma et certa confessorum suorum assertione usque ad mortem servavit integram virginitatem. De claritate vero doctrine, quod citra apostolos et primos doctores nullus tantum quantum iste ecclesiam illuminavit, et quod merito et digne erat sanctorum cathalogo ascribendus.

Quo domino cessante et annuente, procurator ordinis respondit: Ad preceptum tuum elevabitur aquila et ponet in arduis locum suum, quod pulcherrime exposuit et probavit, petens ex parte magistri et totius ordinis dictum doctorem egregium canonizari.

Post quem, dominus rex Robertus incepit suum: Ipse, inquit, erat lucerna ardens et lucens, et perpulchre prosecutus; in fine genuflexit petens tantum doctorem in tanta sanctitate nutritum et fama et in tam sancto Predicatorum ordine, canonizari et sanctorum cathalogo ascribi.

Post, patriarcha Alexandrinus, quondam archiepiscopus Pisanus, frater Odo, proposuit: Similem illum fecit in gloria sanctorum.

Post ipsum, dominus archiepiscopus Capuanus: Lucerna super candelabrum.

Post eum, dominus episcopus Vintoniensis.

Post, Arelatensis.

Ultimo episcopus Lodovensis: Modo novus doctor gentium in fide et veritate. Qui pulchre dixit, nominans eius sanctitatem et ordinis Predicatorum sacram religionem et eius doctrine claritatem, petens sicut omnes alii ipsum canonizari.

Quo cessante, surrexit dominus papa iudicans ipse digne canonizandum, et de consilio dominorum cardinalium, benedictione data, consistorium est terminatum, ubi ego presens fui in presentia domini pape a principio usque in finem.

Tertia die sequenti, scilicet feria secunda in crastino sancti Alexii, dominus papa et cardinales cum omnibus prelatis curie, scilicet episcopis ut supra, in ecclesia beate Marie parati omnes, facta primum collatione per dominum papam dicentem: Magnus est tu et faciens mirabilia, invocato Spiritu Sancto, Veni creator Spiritus cantaverunt; quo facto sedit et proposuit: Redde quod debes, exponens se beati Thome debitorem ut quem Deus tam clare honoravit in celis et ecclesia honoret in terris. Et tunc auctoritate Dei et beatorum Petri et Pauli, dictum doctorem gloriosum publice ascripsit cathalogo sanctorum.

Tunc alta voce cantatum est: Te Deum laudamus. Quo finito, incepta est missa de uno confessore solemnis, quam celebravit dominus papa; cuius introitus fuit: In medio ecclesie, et oratio: Deus qui ecclesiam tuam beati Thome; et epistola: Optavi; responsorium: Os iusti; alleluia pulcherrimum novum sed longum; evangelium: Vos estis sal terre, sicut de beato Dominico.

Plena fuit ecclesia luminaribus magnis et completum est gaudium diu desideratum. Per omnia gratias Salvatori qui refulsit sol in clipeos aureos et resplenduerunt mentes ab eis.

De multis pauca vobis epilogavi, quia omnia scribere longum esset valde, nec potui omnia retinere, gravorque etiam in scribendo.

Volui tamen quod officium eius compilatum per ecclesiam habeatis donec ordo sic vel aliter ordinabit.

His peractis, conventus noster, altera hora, Avenioni cum vicario provincie et prioribus circumstantibus cantaverunt Te Deum alta voce, et dominus archiepiscopus Capuanus eum oratione supradicta finivit.

In crastinum cantavit ipse solemniter missa de beato Thoma: In medio, et domino rege presente, et aliquibus cardinalibus in domo nostra cum personarum multitudine copiosa: mensa etiam copiosa fuit.

In alia die, scilicet feria quarta, dominus archiepiscopus Aquensis, et totius istius negotii apud dominum papam mirabilis procurator, congregari fecit prelatos ex ordine assumptos; et missam cantavit dominus archiepiscopus Arborensis, et mensam Aquensis copiosius fecundavit.

In alia die sequenti, scilicet feria quinta, dominus episcopus Methensis de eodem, ut supra, missam cantavit et comes Sancti Severini mense providit.

In crastino, presente rege, facta est solemnitas Magdalene.

Solemnitatis veritas superat verba mea.

Scriptum in curia in festo Magdalene.



Ad indicem fontium vitae S. Thomae




© 2011 Fundación Tomás de Aquino quoad hanc editionem
Iura omnia asservantur